Կօգտվենք ֆիննական շտեմարաններից

ՀՀ առողջապահության նախարարության մասնագետների Ֆինլանդիա կատարած այցի ընթացքում ՀՀ առողջապահության նախարարության Ակադեմիկոս Ս. Ավդալբեկյանի անվան առողջապահության ազգային ինստիտուտի տնօրեն Պարունակ Զելվեյանի և Ֆինլանդիայի Առողջապահության և սոցիալական ապահովության ազգային ինստիտուտի տնօրեն Պեկկա Պուսկայի միջև ստորագրվել է փոխհամագործակցության հուշագիր։

Դրա շրջանակներում ֆիննական կողմը բազմակողմանի աջակցություն կցուցաբերի Հայաստանում էլեկտրոնային բժշկության ներդրման, ոչ վարակիչ հիվանդությունների դեմ պայքարի և կլինիկական ուղեցույցների  ներդրման գործում:

Բավականին արդյունավետ էր նաև կլինիկական ուղեցույցների պատրաստման գործում միջազգային մեծ հեղինակություն ունեցող «Duodecim» կազմակերպության արտաքին կապերի տնօրեն Թիմո Հայկոնենի, ՀՀ ԱՆ առողջապահական ծրագրերի և որակի կառավարման վարչության պետ Ծաղիկ Վարդանյանի և Պարունակ Զելվեյանի հանդիպումը: Երկուստեք ընդգծվեց առողջապահական համակարգում կլինիկական ուղեցույցների ներդրման կարևորությունը և անհրաժեշտությունը։ Այդ ուղղությամբ Ֆինլանդիայի հաջողված փորձն ուսումնասիրելու և Հայաստանում կիրառելու նպատակով ՀՀ ԱՆ Ակադեմիկոս Ս. Ավդալբեկյանի անվան առողջապահության ազգային ինստիտուտին հնարավորություն ընձեռվեց անվճար օգտվելու «Duodecim»-ի շտեմարաններից:

Հարցեր, պատասխաններ, մեկնաբանություններ